Bekoboddagi uchrashuvda prezidentga she’r o‘qigan metallurg qiz Zulfiya mukofoti bilan taqdirlandi
Toshkent viloyati hokimligining ma’lum qilishicha, “O‘zbekiston metallurgiya kombinati”ning Bekoboddagi quyuv-prokatlash majmuasi mutaxassisi Dilnoza Primkulova davlat rahbari bilan bo‘lib o‘tgan uchrashuvda ishtirok etgan. U suhbat davomida korxonada 1145 nafar yosh mutaxassis, jumladan, 123 nafar xotin-qiz mehnat qilayotganini hamda uning o‘zi ham bolaligidan she’rlar yozib, ushbu mukofotni orzu qilganini bildirdi.
Muloqot chog‘ida metallurg qiz davlat rahbariga o‘zi yozgan metallurglar mehnatiga bag‘ishlangan she’rini o‘qib berdi. Uning chiqishidan so‘ng Shavkat Mirziyoyev qizning og‘ir sanoat sohasida ishlab, ijod qilayotganini inobatga olib, istisno tariqasida uni Zulfiya nomidagi davlat mukofoti bilan taqdirlashni taklif qildi va tegishli farmonni imzoladi.
Mukofot Dilnoza Primkulovaga Toshkent viloyati hokimligida bo‘lib o‘tgan tantanali tadbirda topshirildi. Marosimda Senat raisi Tanzila Narbayeva, hukumat vakillari, viloyat hokimi va jamoatchilik vakillari ishtirok etdi.
