Bank omonatlaridan olinadigan foizlarga soliq joriy etish taklifi berildi. Markaziy bank aniqlik kiritdi
O‘zbekistonda bank omonatlaridan olinadigan foiz daromadlariga 5 foizlik soliq joriy etish taklifi muhokamalarga sabab bo‘ldi. Mazkur tashabbus Iqtisodiyot va moliya vazirligi huzuridagi Fiskal tahlillar instituti tomonidan ilgari surildi.
Institut hisob-kitoblariga ko‘ra, omonatlar bo‘yicha foiz daromadlarini dividendlar bilan tenglashtirib, ularga ham 5 foizlik soliq stavkasini qo‘llash davlat byudjetiga yiliga 1,4 trillion so‘m atrofida qo‘shimcha tushum keltirishi mumkin.
Bu taklif yuzasidan iqtisodchi Bekzod Hoshimov soliq tizimining asosiy muammosi stavkada emas, balki nimaga soliq solinishida ekanini ta’kidladi.
Uning fikriga ko‘ra, amaldagi tizim sarmoyani rag‘batlantirish o‘rniga uni jazolaydi. Hoshimov korxonalarning investitsiyalari, uy-joyni ijaraga berish bilan bog‘liq xarajatlar va boshqa daromad keltiruvchi sarmoyalar soliq bazasidan to‘liq chegirilmasligini tanqid qildi.
"Biz soliqni zanjirning oxirida, hosildan emas, boshida, urug‘likdan olamiz. Ya’ni sarmoyani jazolab, iste’molni rag‘batlantiramiz. Holbuki falsafa teskari bo‘lishi kerak: soliq sof daromaddan, ideal holda esa iste’moldan olinishi lozim", — dedi iqtisodchi.
Shuningdek, u soliq islohoti stavkalarni o‘zgartirishga emas, soliq bazasini takomillashtirishga qaratilishi kerakligini bildirib, daromad olish uchun qilingan hujjatlashtirilgan xarajatlarni soliqdan chegirish imkoniyati yaratilishi lozimligini qayd etdi.
Shu bilan birga, ijtimoiy tarmoqlarda keng muhokama qilinayotgan mazkur masala yuzasidan Markaziy bank ham rasmiy munosabat bildirdi. Regulyator ma’lum qildiki, omonatlardan olinadigan foiz daromadlariga soliq solish bo‘yicha aytilgan fikr Fiskal tahlillar instituti tomonidan o‘tkazilgan ilmiy-tahliliy tadqiqot doirasida ilgari surilgan bo‘lib, rasmiy taklif sifatida kiritilmagan.
Markaziy bank, shuningdek, har qanday tashabbusni ko‘rib chiqishda uning bank resurslari qiymati, moliyaviy resurslar bazasi va mamlakat moliyaviy barqarorligiga ta’siri har tomonlama baholanishini ta’kidladi.
