“Avtomobilsiz kun” qoidasini buzgan amaldorlar intizomiy javobgarlikka tortilishi mumkin
Atmosferaga chiqariladigan zararli gazlarni kamaytirish va ko‘chalarda tirbandlikning oldini olish maqsadida 10-avgust kuni respublika bo‘ylab “Avtomobilsiz kun” aksiyasi o‘tkazilmoqda. Prezidentning joriy yil mart oyidagi farmoniga muvofiq, har oyning 10 va 25-sanalarida ushbu aksiya tashkil etilishi belgilangan.
O‘tkazilgan tadbirlar natijasida birgina Ekologiya milliy qo‘mitasi va uning hududiy tizimidagi 1 730 dan ortiq xizmat hamda shaxsiy avtomobillar harakati cheklanib, havodagi zararli moddalar miqdori 17,3 tonnaga kamaygan.
Hujjatda ushbu kunlarda davlat fuqarolik xizmatchilarining xizmat transportidan foydalanishi qat’iyan taqiqlangan. Ma’muriy javobgarlik to‘g‘risidagi kodeksda maxsus jarima nazarda tutilmagan bo‘lsa-da, taqiqni buzgan rahbar va xodimlar mehnat hamda ijro intizomini buzgani uchun javobgarlikka tortiladi. Bu kunlarda davlat tashkilotlari haydovchilarining maoshi esa to‘liq saqlanib qoladi.
