Asadga jinoyatlarini oqlab bergan bosh muftiy umrbodga qamaldi
Damashqdagi Jinoyat ishlari bo‘yicha to‘rtinchi sud 24-avgust kuni Suriyaning sobiq bosh muftiysi Ahmad Hassunga nisbatan yakuniy hukmni e’lon qilgan. Sobiq diniy rahbar mazhablararo adovat hamda zo‘ravonlikni qo‘zg‘atish, tinch aholining o‘ldirilishini oqlash va xizmat mavqeyini suiiste’mol qilishda aybdor deb topilgan. Qarorga ko‘ra, mahkumning barcha ko‘char va ko‘chmas mol-mulki davlat xazinasi foydasiga musodara qilinadi.
Sud jarayonida Asad rejimi davridagi rasmiy diniy muassasalar tinch aholi yashaydigan hududlarga tashlangan shafqatsiz bochkali bombalar qo‘llanilishini oqlab kelgani alohida ta’kidlangan.
2005-yildan 2021-yilgacha mamlakatning eng yuqori diniy lavozimini egallagan Hassun sobiq prezident Bashar Asadning eng yaqin safdoshlaridan biri hisoblangan va rejim jinoyatlarini diniy tomondan niqoblab bergan.
Ahmad Hassun 2025-yilning mart oyida, Asad hokimiyati ag‘darilgach, Damashq aeroporti orqali mamlakatdan qochib ketishga uringanda qo‘lga olingan. U yangi hokimiyat tomonidan javobgarlikka tortilgan rejimning o‘ninchi yuqori martabali mulozimi bo‘ldi.
Avgust oyida Suriya sudi sobiq prezident Bashar Asad hamda uning amakivachchasi Vosim Asadga nisbatan ham sirtdan o‘lim jazosi hukmini chiqargan edi.
