AQShning eng boy shaharlaridan biri 1-sentyabrni “O‘zbekiston kuni” deb e’lon qildi
O‘zbekiston mustaqilligining 35 yilligi munosabati bilan qabul qilingan ushbu hujjatda mamlakatning o‘tgan davr mobaynidagi suverenitet, taraqqiyot va keng ko‘lamli islohotlar yo‘li yuqori baholangan. Meri Keti B. Uilson o‘z proklamatsiyasida O‘zbekistonning Ipak yo‘li markazidagi strategik o‘rni, Markaziy Osiyodagi eng yirik bozor va jadal rivojlanayotgan iqtisodiyot ekanini alohida e’tirof etgan. Bu haqda O‘zbekistonning Vashingtondagi bosh konsuli Axror Burhonov Portal24.uz’ga ma’lum qildi.
Shuningdek, shaharda O‘zbekiston Bosh konsulxonasi ish boshlagani va Sietl diplomatik vakolatxona joylashgan sanoqli AQSh shaharlaridan biriga aylangani qayd etilgan.
O‘zbekistonning Sietldagi bosh konsuli Axror Burhonov ushbu qarorni ikki xalq o‘rtasidagi do‘stlik va tobora kengayib borayotgan sheriklikning muhim ramzi sifatida baholadi.
Uning ta’kidlashicha, Bosh konsulxonaning ochilishi do‘stona aloqalarni aniq iqtisodiy, texnologik, ta’limiy va madaniy loyihalarga aylantirish imkonini beradi. Shuningdek, joriy yilning 4-sentabr kuni Sietl shahrida AQSh G‘arbiy sohilidagi birinchi O‘zbekiston Bosh konsulxonasining rasmiy ochilish marosimi bo‘lib o‘tadi.
Ma’lumot uchun, Sietl va uning atrofi AQShning eng yirik iqtisodiy markazlaridan biri bo‘lib, 4,1 milliondan ziyod aholi va 600 milliard dollardan ortiq yalpi hududiy mahsulotga ega. Mintaqada Amazon va Starbucks kabi gigantlarning bosh qarorgohlari hamda Microsoft, Boeing, Google, Meta kabi dunyoning yetakchi kompaniyalari faoliyat yuritadi. Shaharning mazkur qarori O‘zbekiston-AQSh munosabatlari hududlararo darajada yangi bosqichga ko‘tarilayotganini ko‘rsatadi.
