AQSHda Green Card uchun soxta nikoh uyushtirgan xalqaro jinoiy guruh fosh etildi
Nyu-York janubiy okrugi prokuraturasi e’lon qilgan ayblovga ko‘ra, 2016-yildan 2026-yil iyuliga qadar faoliyat yuritgan jinoiy guruh 11 kishidan iborat bo‘lgan. Ular AQSH va Xitoy fuqarolari o‘rtasida soxta oilalar tuzish orqali xalqaro sxemani yo‘lga qo‘ygan. Noqonuniy tarmoq Nyu-Yorkdan tashqari Konnektikut, Pensilvaniya, Jorjiya, Florida va boshqa shtatlarga, hatto Vanuatu hamda Xitoy hududiga ham yoyilgan.
Soxta Green Card paketining to‘liq qiymati xitoylik mijozlarga 100 ming dollargacha tushgan. Kelishuvga rozi bo‘lgan amerikaliklarga bosqichma-bosqich 30 ming dollargacha haq berilgan, vositachilar esa har bir jalb qilingan AQSH fuqarosi uchun 5 ming dollar mukofot olib kelgan. Bosh prokuror Todd Blanche ushbu jinoyatni AQSH tarixidagi eng yirik soxta nikoh fitnalaridan biri deb atadi.
Immigratsiya xizmatini aldash uchun alohida ssenariylar tayyorlangan, soxta to‘y marosimlari o‘tkazilib, soxta er-xotinlar an’anaviy xitoy kiyimlarida do‘st va qarindoshlar davrasida suratga tushgan. Ushbu fotoalbomlar Adliya vazirligi tomonidan ashyoviy dalil sifatida jinoyat ishiga ilova qilindi. Eslatib o‘tamiz, AQSH fuqarosi bilan tuzilgan haqiqiy nikoh Green Card olishning asosiy qonuniy yo‘llaridan biri hisoblanadi.
