AQSh vitse-prezidenti o‘zbekistonlik noqonuniy migrant misolida Baydenning immigratsiya siyosatini keskin tanqid qildi
AQSh vitse-prezidenti Jeyms Devid Vens o‘z chiqishida avvalgi ma’muriyatning immigratsiya siyosatini va chegaradagi nazorat sustligini jiddiy qoraladi. Uning ta’kidlashicha, chegaralarning ochiqligi sababli mamlakatga og‘ir jinoyatlarda ayblangan shaxslar noqonuniy ravishda kirib kelgan.
“2022-yilda o‘zining vatanida – O‘zbekistonda Ahror tom ma’noda jihodchilar tashviqotini tarqatish va o‘z vatandoshlarini radikal terrorizmga yollashga urinishda ayblanadi. Xush, u nima qildi? Bayden boshqaruv yillarida har qanday o‘ta xavfli qidiruvdagi jinoyatchi nima qilgan bo‘lsa, shuni qildi: Amerika Qo‘shma Shtatlariga birinchi klass chiptasini qo‘lga kiritdi”, dedi JD Vens.
32 yoshli O‘zbekiston fuqarosi Ahror Bozorov 2022-yilda o‘z vatanida radikal g‘oyalarni tarqatish ayblovi bilan xalqaro qidiruvga berilgan. Shunga qaramay, u 2023-yilning fevral oyida AQSh chegarasini noqonuniy kesib o‘tgan. Chegara xizmati tomonidan ushlanganiga qaramay, u mamlakat ichkarisiga qo‘yib yuborilgan va 2024-yil yanvarida rasmiy ishlash ruxsatnomasini olgan. U Pensilvaniya shtatidan tijorat haydovchilik guvohnomasi (CDL) olib, Filadelfiya shahrida ro‘yxatdan o‘tgan holda 40 tonnalik tijorat yuk mashinasini boshqargan.
“AQShda noqonuniy yurgan ushbu tom ma’noda ayblangan terrorist nima qilayotgan edi? U har kuni farzandlaringiz bilan yuradigan ko‘chalarda tijorat yuk mashinasi haydovchisi bo‘lib ishlab yurgan edi. Pensilvaniyaning demokrat gubernatori Josh Shapiro Ahrorga Amerika Qo‘shma Shtatlari magistrallarida 40 tonnalik yuk mashinasini boshqarish uchun guvohnoma bergan edi”, deya ta’kidladi vitse-prezident.
AQSh Immigratsiya va bojxona politsiyasi (ICE) ma’lumotlariga ko‘ra, A.Bozorov 2025-yil 9-noyabr kuni Kanzas shtatida yuk mashinasini boshqarib ketayotgan vaqtida xavfsizlik kuchlari tomonidan hibsga olingan. JD Vens o‘z nutqi yakunida migratsiya inqirozini bartaraf etish uchun yangi qonunlar emas, balki qonunlarni qat’iy ijro etuvchi davlat rahbariyati zarurligini bildirdi.
“Rahbariyatdagi demokratlar migratsiya qonunlarimizni ijro etishdan bosh tortgani sababli Kanzas yo‘llari kamroq xavfsiz bo‘lib qoldi. Yillar davomida biz demokratlardan janubiy chegarada o‘zlari keltirib chiqargan inqirozni hal qilish uchun yangi ulkan qonun kerakligi haqidagi gaplarni eshitdik. Lekin ma’lum bo‘lishicha, bizga yangi qonunlar kerak emas ekan, xonimlar va janoblar, shunchaki Amerika Qo‘shma Shtatlarining yangi prezidenti kerak edi”, deya yakunladi u.
