AQSH Rossiya energiya resurslarini sotib oluvchi davlatlarga boj joriy etishi mumkin
Senator Lindsi Grem muallifligidagi yangilangan sanksiyalar to‘g‘risidagi qonun loyihasi AQSH prezidentiga Rossiya nefti va tabiiy gazini yetkazib berishga ko‘maklashayotgan mamlakatlar va shaxslarga qarshi bojlar qo‘llash vakolatini beradi.
Cheklovlar birinchi navbatda Rossiya neftining eng yirik xaridorlari bo‘lgan Xitoy, Hindiston, Slovakiya, Vengriya va Ozarbayjonga, shuningdek, Rossiya gazini sotib oluvchi Xitoy, Fransiya, Yaponiya, Vengriya va Belgiyaga qaratilgan. Hujjatda Rossiyadan import qilinadigan gaz ulushi jami iste’molining 15 foizidan kam bo‘lgan hamda ushbu qaramlikni kamaytirayotgan davlatlar (masalan, Yaponiya, Fransiya, Vengriya va Belgiya) uchun maxsus istisno nazarda tutilgan.
Sanksiyalar paketida Rossiya mudofaa, energetika va moliya tashkilotlari hamda "soya floti"ga qarshi choralar ham o‘rin olgan. Tahlilchilarning ta’kidlashicha, mazkur qonun qabul qilinsa, Kongress ilk bor bojxona bojlaridan geosiyosiy qurol sifatida foydalangan bo‘ladi.
Reuters ushbu variantni “yumshatilgan” loyiha deb atadi, chunki 2025-yil apreldagi dastlabki loyihada boj stavkasi 500 foiz etib belgilangan edi.
Avvalroq Rossiyadan O‘zbekistonga gaz eksporti 10 milliard kub metrdan oshishi kutilayotgani xabar qilingan edi.
