Apple dunyoning eng qimmat kompaniyasiga aylandi
Apple bozor qiymati bo‘yicha Nvidia’ni ortda qoldirib, dunyodagi eng qimmat kompaniyaga aylandi. “Bloomberg” xabariga ko‘ra, 17-iyul kungi savdolarda Nvidia aksiyalari 3,7 foizga pasayib, kompaniya qiymati 4,8 trillion dollarga tushgan. O‘z navbatida Apple aksiyalari 0,4 foizga o‘sgan va kompaniya kapitalizatsiyasi 4,9 trillion dollarga yetgan.
Nvidia 2025-yilning may oyidan buyon birjadagi eng qimmat kompaniyalar reytingini boshqarib kelayotgan edi, xususan, o‘sha yilning oktabrida uning qiymati 5 trillion dollargacha ko‘tarilgandi. “Reuters” tahlilchilarining qayd etishicha, reytingdagi bu almashinuv investorlarning e’tibori sun’iy intellekt (SI) bumidan ko‘ra kengroq doiraga ko‘chayotganidan dalolat beradi.
Avvalroq Apple o‘z modellarini rivojlantirishga yetarli mablag‘ sarflamagani uchun SI poygasida ortda qolayotgan deb hisoblangan bo‘lsa, endilikda bozordagi kayfiyat o‘zgargan. Ekspertlarning fikricha, Apple o‘z ekotizimi, xizmatlari va qurilmalarni muntazam yangilab turish imkoniyati tufayli sun’iy intellektdan barqaror pul ishlash uchun ancha qulay pozitsiyaga ega. Kompaniyaning qayta baholanishi spekulyativ o‘sishni emas, balki uning daromadlari barqarorligiga bo‘lgan ishonchni aks ettirmoqda.
