Anomal issiq sabab O‘zbekistonda yo‘l harakati cheklanib, bog‘chalar yopilmoqda

Issiq haroratda og‘ir yuk mashinalarining harakatlanishi yo‘llarda g‘ildirak izlari va deformatsiyalarni keltirib chiqarishini inobatga olib, “Yo‘l harakati to‘g‘risida”gi hamda “Avtomobil yo‘llari to‘g‘risida”gi qonunlar talablariga muvofiq cheklovlar o‘rnatildi. Unga ko‘ra, Termiz shahri, tuman markazlari va ularni bog‘lovchi avtomobil yo‘llarida og‘ir yuk transporti harakati har kuni soat 10:00 dan 19:00 gacha vaqtincha taqiqlanadi.

Sog‘liqni saqlash vazirligi esa anomal issiqda aholiga, ayniqsa yosh bolalar va xavf guruhidagi shaxslarga salqin joyda bo‘lishni hamda yetarli miqdorda suv ichishni tavsiya qilmoqda.

Shu bilan birga, Navoiy viloyatining ayrim hududlarida havo harorati +44...+45 darajagacha ko‘tarilishi kutilayotgani sababli maktabgacha yoshdagi bolalarni issiq ta’siridan himoya qilish maqsadida davlat bog‘chalari faoliyati vaqtincha to‘xtatiladi. Mahalliy hokimliklar farmoyishiga ko‘ra, 14-17-iyul kunlari Uchquduq va Nurota tumanlaridagi barcha davlat bog‘chalari, Tomdi tumanidagi 2-, 4- va 5-sonli hamda Konimex tumanidagi 1-11 va 13-17-sonli bog‘chalar ishlamaydi.

Ushbu muassasalar 20-iyul, dushanba kunidan odatdagi tartibda faoliyatini davom ettiradi. Viloyatning boshqa hududlaridagi bog‘chalar tekshiruvdan o‘tkazilmoqda va natijalarga qarab qo‘shimcha qarorlar qabul qilinishi mumkin.

Xuddi shunday tartibda Xorazm viloyatidagi barcha davlat bog‘chalari ham 14-17-iyul kunlari yopilib, faoliyatini 20-iyuldan tiklaydi. Qoraqalpog‘istonda esa davlat va nodavlat bog‘chalarining faoliyati hududlar kesimidagi sharoitdan kelib chiqib, turlicha muddatlarga to‘xtatildi. Maktabgacha va maktab ta’limi vazirligi ushbu masala yuzasidan respublika miqyosida yagona qaror qabul qilinmaganini, har bir hududdagi vaziyat ob-havo va sanitariya-epidemiologik holatga qarab alohida baholanayotganini ma’lum qildi.