Andijonda erini o‘ldirish uchun 3 ming dollarga killer yollagan ayol ushlandi
Asaka tumanida yashovchi, 1974-yilda tug‘ilgan ayol o‘zi bilan birga yashayotgan sobiq turmush o‘rtog‘ini (1972-y.t.) o‘ldirish uchun 3 ming dollar evaziga yollanma qotil izlayotgani haqida IIBga tezkor ma’lumot kelib tushgan. Jinoyatga uy-joy mojarosi sabab bo‘lgani aniqlangan.
Huquq tartibot organlari tomonidan jalb qilingan shartli yollanma qotil bilan ayol 10-iyul kuni ko‘rishgan. U erini o‘ldirish uchun boshlang‘ich to‘lov sifatida 5 million so‘m berib, qolgan qismini qotillik amalga oshirilgach to‘lashi haqida tilxat yozib bergan.
11-iyulga o‘tar kechasi "qotil" erning jasadini adirlikda grimmlangan holatda tayyorlab, buyurtmachi ayolni chaqirgan. Ayol sobiq erining o‘lganiga ishonch hosil qilib, mashinada pulni berayotgan vaqtda daliliy ashyolar bilan qo‘lga olingan.
Hozirda mazkur holat yuzasidan ayolga nisbatan Jinoyat kodeksining 25, 97-moddasi 2-qismi “i” bandi (Tamagirlik niyatida qasddan odam o‘ldirishga suiste’mollik) bilan jinoyat ishi qo‘zg‘atilgan. Tasdiqlangan reja tufayli qotillikning oldi olindi.
