“Amir Temur xiyoboni” bekati tunneliga oqova suv sizib kirdi
Ijtimoiy tarmoqlarda poytaxt metrosining “Amir Temur xiyoboni” bekati hududida sassiq hid kelayotgani haqida xabarlar tarqaldi. Ushbu holat yuzasidan “Toshkent metropoliteni” AJ rasmiy munosabat bildirib, muammoning kelib chiqish sabablariga aniqlik kiritdi.
Ma’lum bo‘lishicha, noxush hid poytaxtning Mustaqillik shoh ko‘chasida joylashgan shahar oqova suv tarmoqlaridagi nosozlik natijasida kelib chiqqan. Kanalizatsiya tizimidan sizib chiqqan suv metro tunnelining beton konstruksiyalari orqali ichki qismga o‘tgan va bekat hududida yoqimsiz hid tarqalishiga olib kelgan.
Yuzaga kelgan muammoni bartaraf etish maqsadida metro rahbariyati Toshkent shahar hokimligi hamda Oqova suv tarmoqlari boshqarmasiga rasmiy murojaat yo‘lladi. Hozirda quvurlardagi nosozlikni zudlik bilan yo‘qotish choralar ko‘rilmoqda va obyekt yo‘lovchilar xavfsizligini ta’minlash uchun to‘liq nazoratga olingan.
