Alisher Navoiy nomidagi davlat Adabiyot muzeyi to‘liq Yangi Toshkentga ko‘chiriladi
Ijtimoiy tarmoqlarda Oʻzbekiston Fanlar akademiyasi Alisher Navoiy nomidagi davlat Adabiyot muzeyi yopilishi haqida xabarlar tarqaldi. Holat yuzasidan O‘zbekiston Fanlar akademiyasi rasmiy izoh berdi.
Qayd etildiki, muzey to‘liq Yangi Toshkentga ko‘chiriladi va yangi bino ishga tushgunga qadar:
- muzey fondidagi qoʻlyozma va toshbosma manbalar, shuningdek, “Oʻzbekiston yozuvchilari va shoirlari arxivi” fondi Oʻzbekiston Respublikasi Vazirlar Mahkamasi huzuridagi Oʻzbekistondagi Islom sivilizatsiyasi markaziga;
- muzeyning boshqa eksponatlari esa Oʻzbekiston Respublikasi Fanlar akademiyasining Antropologiya institutiga vaqtinchalik saqlash uchun koʻchirib oʻtkazilmoqda.
Fanlar akademiyasi shuningdek, hozirga qadar qadar amalga oshirilgan ishlar yuzasidan bayonot bergan. Xususan:
2026-yilning 9-iyun kuni belgilangan meʼyoriy talablar asosida muzeyning masʼul xodimlari tomonidan muzeyda saqlanayotgan 847 dona nodir qoʻlyozma manbalar Oʻzbekistondagi Islom sivilizatsiyasi markazining maxsus saqlash xonalariga koʻchirilib joylashtirildi. Ayni paytda qoʻlyozmalarni muhofaza qilish va vaqtincha saqlash tartibiga oid zarur hujjatlar rasmiylashtirish bosqichida turibdi.
Hozirgi vaqtda muzey tomoshabinlar va tadqiqotchilar uchun vaqtincha yopilgan boʻlsa-da, muassasa xodimlari oʻz xizmat vazifalarini toʻliq bajarmoqda. Ayni paytga qadar 1 491 dona toshbosma manba, 439 ta papkadagi foto-nusxalar, 145 ta papkadagi plyonka va negativlar, shuningdek, 1 416 512 ta hujjatni oʻz ichiga olgan “Oʻzbekiston yozuvchilari va shoirlari arxivi” fondi birlamchi xatlovdan oʻtkazilgan. Hozirda muzey eksponatlarini birlamchi xatlovdan oʻtkazish ishlari izchil davom etmoqda.
Mazkur ishlar muzey faoliyatini takomillashtirish, uning moddiy-texnik bazasini yaxshilash va madaniy meros obyektlarini yanada ishonchli muhofaza qilishga qaratilgan. Barcha jarayonlar qonunchilik talablari asosida, masʼul mutaxassislar ishtirokida amalga oshirilmoqda.
