Aholining ipoteka subsidiyalari uchun 1,1 trillion so‘mdan ortiq mablag‘ ajratildi
Vazirlik ma’lumotlariga ko‘ra, ajratilgan mablag‘larning 367 milliard so‘mi 12 355 nafar fuqaroning uy-joy xarididagi boshlang‘ich badal xarajatlarini qoplashga yo‘naltirildi. Qolgan 774,1 milliard so‘m miqdoridagi mablag‘ esa o‘tgan yillarda olingan ipoteka kreditlarining foiz to‘lovlarini yengillashtirish uchun to‘lab berilgan. Shuningdek, maqsadli ipoteka omonatlari bo‘yicha 357 ta holatda 19,4 milliard so‘mlik subsidiya ajratilgan.
Boshlang‘ich badal uchun ajratilgan subsidiyalardan foydalanish bo‘yicha hududlar orasida Vodiy viloyatlari yetakchilik qilmoqda. Xususan, Andijon viloyatida 1 472 nafar fuqaroga 43,8 milliard so‘m ajratilib, birinchi o‘rin qayd etilgan bo‘lsa, Farg‘ona viloyatida 1 410 nafar (41,9 mlrd so‘m), Namanganda 1 406 nafar (41,6 mlrd so‘m) hamda Qashqadaryoda 1 260 nafar (37,5 mlrd so‘m) fuqaro ushbu imtiyozdan foydalangan.
Tijorat banklari kesimida eng ko‘p subsidiyali ipoteka kreditlari Agrobank hisobiga to‘g‘ri keldi – ushbu bank orqali 3 779 ta holatda 112,3 milliard so‘mlik boshlang‘ich badal subsidiyasi to‘lab berilgan. Yetakchi o‘rinlarni, shuningdek, Ipotekabank (1 538 ta), Xalq banki (1 371 ta) hamda Biznesni rivojlantirish banki (1 326 ta) egallagan.
