Aholi uchun suyultirilgan gaz ta’minotiga xususiy sektor kirib keladi. “Andijon tajribasi” yo‘lga qo‘yiladi
Prezident raisligidagi yig‘ilishda kuz-qish mavsumiga tayyorgarlik masalalari ko‘rib chiqildi. Bugungi kunda tabiiy gaz yetib borishi qiyin bo‘lgan 1 916 ta mahalla mavjud bo‘lib, mas’ullarga 3 oy muddatda ushbu hududlardagi isitish tizimini elektr energiyasiga o‘tkazish bo‘yicha aniq hisob-kitob va alohida dastur ishlab chiqish topshirildi.
Shuningdek, mamlakatdagi 3,7 million xonadon foydalanadigan suyultirilgan gaz ta’minotidagi uzilishlarni bartaraf etish uchun xususiy sektor jalb etiladi. Bu boradagi tajriba birinchi bo‘lib Andijon viloyatida joriy qilinadi. Viloyatda olti oyda yetkazib berish rejasi bajarilmay, 318 ta mahallada ta’minot orqada qolgan.
Yangi tartibga ko‘ra, tadbirkorlar import qilgan yoki birjadan olgan gazini aholi hamda biznes subyektlariga to‘g‘ridan-to‘g‘ri yetkazib berishi mumkin bo‘ladi. Ma’lumot uchun, yil boshidan buyon xususiy biznes 157 ming tonna suyultirilgan gaz import qilgan.
Ijtimoiy reyestrga kiritilgan oilalarga esa suyultirilgan gaz xarid qilish uchun davlat tomonidan subsidiya ajratiladi. Yil yakunigacha mamlakat bo‘yicha suyultirilgan gaz ishlab chiqarish hajmini rejadagi 520 ming tonnadan 606 ming tonnaga yetkazish vazifasi qo‘yildi.
Tizimdagi yana bir yangilik – gaz ballonlari hajmi bilan bog‘liq. Hozirgi bir xil 20 kilogrammli standart ballonlar o‘rniga, iste’molchilar ehtiyojiga qarab 5-6 kg dan 30-40 kg gacha bo‘lgan ballonlar amaliyotga kiritiladi. Suyultirilgan gazni tashish va saqlash tizimi bir oy muddatda xalqaro standartlar asosida to‘liq qayta ko‘rib chiqiladi.
