Aholi ishonsa ishlaydi, bo‘lmasa bo‘shatiladi. Profilaktika inspektorlariga “ishonchsizlik bildirish” tizimi ham joriy etilmoqda
Prezidentning yangi qaroriga muvofiq, profilaktika inspektori faoliyatining bosh maqsadi mahallada jinoyatchilikni jilovlash hamda aholining yuqori darajadagi ishonishiga erishish etib belgilandi. Shu munosabat bilan, mahalliy aholi o‘rtasida ovoz berish yo‘li bilan inspektorga nisbatan “ishonchsizlik bildirish” tizimi amaliyotga kiritilmoqda. Agar aholi e’tirozi tasdiqlansa, bu xodimni ichki ishlar organlari safidan bo‘shatishgacha bo‘lgan chora qo‘llashga asos bo‘ladi.
Hujjat bilan inspektorlarni o‘z xizmat vazifasiga kirmaydigan ortiqcha vazifalardan xalos etish ham ko‘zda tutilgan. Endilikda ularga o‘z kasbiy faoliyatidan tashqari qo‘shimcha topshiriqlar yuklash hamda bevosita rahbari bo‘lmagan boshqa amaldorlar tomonidan buyruq berilishiga qat’iyan yo‘l qo‘yilmaydi. Shuningdek, sudlar tomonidan inspektorlar yuritgan elektron ma’muriy ishlarga qo‘shimcha ravishda qog‘oz hujjatlarni talab qilish amaliyoti ham tugatildi.
Bundan buyon mahalla inspektorlarining ish samaradorligi uchta asosiy mezon bo‘yicha baholanadi. Bular — fuqarolarning xodimga bo‘lgan ishonch darajasi, xavf guruhiga kiruvchi shaxslar tomonidan yoki ularga nisbatan sodir etilgan jinoyatlar ko‘rsatkich hamda ma’muriy huquqbuzarliklarning takrorlanish darajasidir. Yangi tartib inspektorlarning mas’uliyatini oshirishga xizmat qilishi kutilmoqda.
Avvlaroq O‘zbekistonda profilaktika inspektorlarining faoliyat doirasi sezilarli darajada kengaytirilgani haqida xabar berilgandi.
