Ahadxon Kimsanboyev ko‘zi ojizlar o‘rtasida shaxmat bo'yicha jahon chempioni bo‘ldi
Bolgariya poytaxti Sofiya shahrida 19-30- iyul kunlari ko‘zi ojiz va zaif ko‘ruvchi shaxmatchilar o‘rtasida o‘tkazilgan IV IBSA Jahon chempionatida Ahadxon Kimsanboyev g‘olib bo‘ldi. Bu haqda Shaxmat federatsiyasi xabar berdi.
Chempionat Xalqaro Ko‘zi ojizlar sport assotsiatsiyasi (IBSA) shafeligida o‘tkazilib, unda dunyoning turli mamlakatlaridan eng kuchli ko‘zi ojiz va zaif ko‘ruvchi shaxmatchilar ishtirok etdi. Kimsanboyev O‘zbekiston para shaxmati uchun so‘nggi yillardagi muhim yutuqlardan birini qayd etdi. U musobaqa davomida ishonchli o‘yin namoyish etib, hal qiluvchi partiyalarda ham yetakchilikni saqlab qoldi va ko‘zi ojiz hamda zaif ko‘ruvchi shaxmatchilar orasida dunyoning eng kuchli sportchisiga aylandi.
Jahon chempionatida O‘zbekiston sharafini Abboshon Ahmadxonov, Sabohat Ikromaliyeva, Muhsina Madaminova va Zuhra Olimjonova ham himoya qildi. Ular ham xalqaro maydonda munosib ishtirok etdi.
