Afg‘onistondan keladigan yuk mashinalariga O‘zbekiston yengillik bermoqda
Afg‘oniston Transport va aviatsiya vazirligi xabariga ko‘ra, O‘zbekiston transport vaziri Ilhom Mahkamov afg‘onistonlik hamkasbi Mulla Muhammad Fazel Mazlum bilan uchrashuv o‘tkazgan. Muloqot chog‘ida Toshkent afg‘on yuk tashuvchilari uchun tranzit imkoniyatlarini oshirishga tayyorligini bildirdi.
Muzokaralar davomida tomonlar ikki mamlakat haydovchilari uchun viza berish tartibini yengillashtirish hamda erishilgan kelishuvlarni amaliyotga tatbiq etuvchi qo‘shma texnik ishchi guruh tuzish masalasini muhokama qilgan.
O‘zbekiston Afg‘onistonning Markaziy Osiyo bilan tashqi savdosida asosiy tranzit yo‘lagi sanaladi. Tranzit qoidalarining soddalashtirilishi, ayniqsa, Afg‘onistonning shimoliy hududlaridagi tadbirkorlar va yuk tashuvchilar faoliyatini sezilarli darajada yengillashtirishi kutilmoqda.
