Afg‘onistonda 2,4 million qiz ta’limdan uzildi, 2030-yilga borib bu ko‘rsatkich 4 millionga yetishi mumkin
“Aljazeera” xabar qiladiki, maktabdan uzilgan qizlar soni o‘tgan yilgiga nisbatan 200 ming nafarga ko‘paygan. Mamlakatda qizlarning o‘rta maktabga borishi 2022-yil martida, universitetlarda o‘qishi esa o‘sha yil dekabrida taqiqlangan edi. Ayollarning o‘g‘il bolalarga dars berishi ham cheklangani ortidan ta’lim tizimida kadrlar tanqisligi kuchaygan – 2030-yilga borib 11 mingdan ortiq ayol o‘qituvchi yetishmasligi taxmin qilinmoqda.
Bundan tashqari, boshlang‘ich ta’limda ham 2 milliondan ziyod bola maktabga bormayapti, maktablarning teng yarmida esa suv, sanitariya va isitish tizimi yo‘q. “Tolibon” xalqaro hamjamiyatning cheklovlarni bekor qilish bo‘yicha talablarini ichki ishlariga aralashuv deb baholamoqda. BMTning UNICEF jamg‘armasi ham mamlakatda 5 yoshgacha bo‘lgan 3,7 million bola oziq-ovqat tanqisligi va to‘yib ovqatlanmaslik xavfi ostida ekanidan ogohlantirdi.
