350 ming xonadonni elektr bilan ta’minlaydigan mikro GESlarning qurilish tartibi soddalashtirilib, auksion tizimi o‘zgaradi
Yangi berilgan takliflarga ko‘ra, 100 kilovattgacha bo‘lgan mikro GESlarni loyihalash hamda barpo etish jarayonlari yengillashtiriladi. Ayniqsa, quvvati 50 kilovattgacha bo‘lgan kichik loyihalar shaharsozlik hujjatlari ekspertizasi va davlat qurilish nazoratidan to‘liq ozod etiladi. Shuningdek, suv xo‘jaligi obyektlarida o‘z ehtiyojlari uchun mikro GESlar qurishda auksion talabi bekor qilinishi hamda kanallar konstruksiyasiga o‘zgartirish kiritishga ruxsat berilishi ko‘zda tutilgan.
Sohadagi asosiy to‘siqlardan biri – asbob-uskunalar va butlovchi qismlarning 90 foizi xorijdan import qilinayotganidir. Shu sababli mahalliy ishlab chiqarishni yo‘lga qo‘yish, loyihalash va montaj ishlarini kompleks tashkil etish choralari belgilanmoqda. Qolaversa, auksionlarda yerlarni “nol” qiymatda yutib olib, keyinchalik loyihani amalga oshirmaslik muammosiga chek qo‘yish uchun tariflarning eng quyi chegarasi hamda stansiya quvvatiga qarab tabaqalashtirilgan tizim joriy etiladi.
Ma’lumot uchun, o‘tgan yili xususiy sektor ishtirokida 3 mingga yaqin kichik GES qurish belgilangan bo‘lsa-da, hozirgacha ularning faqat 64 tasi ishga tushirilgan. Tizimda Jahon bankining 150 million dollarlik imtiyozli mablag‘laridan foydalanish ham sust kechmoqda. Shu munosabat bilan mamlakatdagi 173 ming kilometrdan ortiq daryo va kanallar to‘liq xatlovdan o‘tkazilib, jarayonlarni nazorat qiluvchi raqamli platforma hamda kadrlar uchun dual ta’lim tizimi yo‘lga qo‘yiladi.
