3000 yevrogacha jarima. Portugaliyada burqa kiyish va yuzni berkitish rasman taqiqlandi
O‘ng qanot partiyalari tashabbusi bilan parlamentda qabul qilingan ushbu qonun loyihasi iyul oyida tasdiqlangan va so‘l kuchlarning keskin e’tiroziga sabab bo‘lgan edi. Mamlakat prezidenti Antoniu Hose Seguru taqiqni izohlar ekan, inson yuzi uning shaxsiyati hamda jamiyatdagi muloqotining asosiy belgisi ekanini ta’kidlagan.
Hujjat jamoat joylarida shaxsni aniqlashga xalaqit beradigan har qanday libosni taqiqlash bilan birga, birovni majburan yuzini berkitishga majburlashni ham qonunga zid deb topadi.
Yangi tartibni buzgan fuqarolar uchun 150 yevrodan 3000 yevrogacha bo‘lgan miqdorda yirik jarima jzosi belgilangan. Biroq qonunda tibbiy zarurat, kasbiy majburiyat, ob-havo sharoiti hamda ijodiy faoliyat bilan bog‘liq hollar uchun istisnolar ko‘zda tutilgan. Shuningdek, ibodatxonalar, diplomatik binolar va havo kemalari ichida yuzni berkitishga ruxsat saqlanib qoladi.
Inson huquqlari bo‘yicha xalqaro tashkilotlar va mahalliy faollar ushbu taqiqni ayollarning shaxsiy tanlov hamda kiyinish erkinligiga aralashuv sifatida baholab, qattiq qoralamoqda. Davlat rahbari ham bu masala jamiyat uchun o‘ta nozik va munozarali ekanini tan olgan bo‘lsa-da, qonun rasman kuchga kirdi.
