2027-yildan yagona bojxona to‘lovi 20 foiz etib belgilanadi, har kg uchun kamida 2 dollar undiriladi
O‘zbekistonda bojxona ma’murchiligini yanada soddalashtirish va tadbirkorlar uchun qulay sharoit yaratishga qaratilgan yangi tartiblar joriy etiladi. Tegishli farmonga ko‘ra, 2027-yildan boshlab bojxona nazorati va tovarlarni rasmiylashtirish jarayonlarida qator o‘zgarishlar kuchga kiradi.
Xususan, 2027-yil 1-iyundan bojxona nazorati vaqtida tovarning kelib chiqishi sertifikati va taqdim etilgan boshqa hujjatlar o‘rtasida tovar xususiyatlariga ta’sir qilmaydigan kichik tafovutlar aniqlansa, bu holat sertifikatni rad etish uchun asos bo‘lmaydi.
Shuningdek, eksport qilinayotgan tovarlar uchun ekologik sertifikatni rasmiylashtirish eksport qiluvchining ixtiyoriy murojaati asosida amalga oshiriladi.
Yangi tartibga ko‘ra, tranzit deklaratsiyalarini transport vositasi chegara bojxona postiga yetib kelishidan oldin topshirish imkoniyati yaratiladi. Bu tovarlarni chegaradan o‘tkazish va bojxona rasmiylashtiruvi jarayonlarini tezlashtirishga xizmat qilishi kutilmoqda.
Bundan tashqari, dastlabki bojxona yuk deklaratsiyasini taqdim etishning yangi soddalashtirilgan amaliyoti joriy qilinadi.
Unga ko‘ra, dastlabki deklaratsiya vakolatli idoralar tomonidan tovarlarga tegishli sertifikat va ruxsat beruvchi hujjatlarni olish uchun ariza sifatida qabul qilinadi.
Xavf darajasi past bo‘lgan tovarlarga sertifikat va ruxsat beruvchi hujjatlar dastlabki bojxona yuk deklaratsiyasi asosida oldindan rasmiylashtiriladi.
Shu bilan birga, yakuniy deklaratsiyada vakolatli idoralar tomonidan berilgan sertifikat va ruxsat beruvchi hujjatlarni aks ettirish amaliyoti bekor qilinadi.
Dastlabki deklaratsiya asosida olib kirishga ruxsat berilgan tovarlar chegara bojxona postiga yetib kelganidan so‘ng, ularning xavf darajasidan kelib chiqib tezlashtirilgan tartibda chiqarib yuboriladi.
Yagona bojxona to‘lovi miqdori belgilanadi
2027-yil 1-yanvardan yagona bojxona to‘lovi stavkasi tovarning bojxona qiymatining 20 foizi miqdorida, biroq har bir kilogramm uchun 2 AQSH dollaridan kam bo‘lmagan miqdorda belgilanadi.
