1976-yilda qurilgan Nukusdagi markaziy qozonxona yangidan quriladi
Prezident Shavkat Mirziyoyev Nukus shahridagi markaziy qozonxonani kogeneratsiya texnologiyalari asosida modernizatsiya qilish loyihasi taqdimoti bilan tanishdi.
Nukusdagi amaldagi markaziy qozonxona 1976-yilda qurilgan bo‘lib, bugungi kunda asosan ijtimoiy soha obyektlarini issiqlik bilan ta'minlaydi. Uning uskunalari eskirgani sababli energiya samaradorligi past bo‘lib, 1 gigakaloriya issiqlik ishlab chiqarish uchun qariyb 153 kub metr tabiiy gaz va 30 kilovatt-soat elektr energiyasi sarflanadi.
Loyiha doirasida qozonxona davlat-xususiy sheriklik asosida zamonaviy kogeneratsiya texnologiyalari bilan yangilanadi. Natijada bir vaqtning o‘zida soatiga 34,4 gigakaloriya issiqlik va 21,5 megavatt elektr energiyasi ishlab chiqarish quvvatiga ega majmua barpo etiladi.
Shuningdek, 28 kilometr issiqlik tarmog‘i tortilib, 189 ta individual issiqlik punkti o‘rnatiladi. Birinchi bosqichda 136 ta ko‘p qavatli uy, qariyb 6 ming xonadon (23 ming nafar aholi) hamda 40 ta ijtimoiy obyekt markazlashgan issiqlik tizimiga ulanadi.
Loyihaning dastlabki bosqichiga 20 million dollardan ortiq to‘g‘ridan-to‘g‘ri xorijiy investitsiya jalb qilinadi. Majmuani 2028-yil fevral oyida to‘liq ishga tushirish rejalashtirilgan.
Modernizatsiya natijasida qozonxonaning foydali ish koeffitsiyenti 80 foizdan 91 foizgacha oshadi, yiliga 172 ming megavatt-soat elektr energiyasi ishlab chiqarish imkoniyati yaratiladi. Shuningdek, har yili 12,2 million kub metr tabiiy gaz tejalishi va atmosferaga chiqariladigan zararli moddalar hajmi kamayishi kutilmoqda.
