1700 ga yaqin ustoz va tarbiyachilarga vazir ustamasi to‘lanadi
Vazir jamg‘armasi tanlovi g‘oliblari respublika bo‘yicha taqsimlandi. Unga ko‘ra, umumta’lim maktablaridan 1 400 nafar, ixtisoslashtirilgan ta’lim muassasalaridan 98 nafar hamda maktabgacha ta’lim tashkilotlaridan 198 nafar vakil ushbu ro‘yxatdan joy oldi. Tanlov uchun ajratilgan umumiy kvota 1 900 tani tashkil etib, barcha fan yo‘nalishlari va hududlar kesimida teng taqsimlangan edi.
G‘oliblarga ustamalar 2026-yilning sentyabr oyidan 2027-yilning may oyiga qadar, ya’ni 9 oy davomida har oy muntazam to‘lab boriladi. To‘lov miqdori respublikadagi mehnatga haq to‘lashning eng kam miqdoriga ko‘ra hisoblanadi. Jumladan, umumta’lim va ixtisoslashtirilgan maktablar o‘qituvchilariga MHTEKMning 5,5 baravari miqdorida (7 million 480 ming so‘m), bog‘cha tarbiyachilariga esa 2 baravari miqdorida (2 million 992 ming so‘m) har oylik qo‘shimcha pul beriladi.
Ma’lumot uchun, pedagog kadrlarni moddiy qo‘llab-quvvatlashga qaratilgan ushbu vazir ustamasi tizimi 2022-yilda joriy etilgan. Joriy yilning 1-sentyabridan e’tiboran mamlakatda mehnatga haq to‘lashning eng kam miqdori 1 million 360 ming so‘m deb belgilanishi hisobiga ustamalar summasi ham shunga mutanosib ravishda oshirildi.
