1-oktyabrdan Iroqda birorta ham xorijiy askar qolmaydi. AQSH koalitsiyasi mamlakatni to‘liq tark etmoqda
Iroq hukumati rahbari ushbu bayonotni AQSH Markaziy qo‘mondonligi rahbari general Bred Kuper bilan uchrashuvdan so‘ng e’lon qildi. Rasmiy Bag‘dodga ko‘ra, 1-oktyabr mamlakat davlatchiligi tarixida yangi sahifa ochadi va Iroq har qanday xorijiy harbiy ishtirokdan xoli hududga aylanadi.
Qo‘shinlarni olib chiqish bo‘yicha kelishuvlar shartlari iyul oyida Vashingtonda o‘tkazilgan muzokaralar davomida belgilab olingan.
AQSH boshchiligidagi koalitsiya Iroqqa ilk bor 2003-yilda kirib kelgan va Saddam Husayn rejimini ag‘dargan edi. 2011-yilda harbiy bo‘linmalar olib chiqilgan bo‘lsa-da, 2014-yilda ISHID tahdidi sababli Bag‘dod taklifi bilan koalitsiya yana ortga qaytgandi. Keyinchalik, 2021-yilga kelib jangovar operatsiyalar rasman yakunlangan edi.
Hozirda Iroq hududida AQSHning 2 500 nafarga yaqin harbiy xizmatchisi bo‘lib, ular Bag‘dod, Anbar va Kurdiston mintaqasidagi uchta bazada joylashgan. Amerika tomoni kelishuvni tasdiqlagan bo‘lsa-da, keyinchalik mamlakatda qancha kontingent va qaysi hududda qolishi borasida batafsil ma’lumot berishdan tiyildi.
