Yuzaki javoblarga chek qo‘yiladi. Fuqarolarga amaldorlar javobini rad etish huquqi berildi
Prezident Xalq qabulxonasi va Raqamli texnologiyalar vazirligi hamkorligida davlat idoralariga yuborilgan murojaatlar ijrosini kuzatib boruvchi yangi SMS-xabarnoma xizmati ishga tushirildi. Yangi mexanizm fuqarolarga o‘z murojaatining ko‘rib chiqilish bosqichlarini bevosita va shaffof tarzda nazorat qilish imkoniyatini taqdim etmoqda.
Endilikda har bir murojaat ko‘rib chiqilishi jarayonida fuqaroning telefoniga maxsus havola ko‘rsatilgan SMS-xabar yuboriladi va bu ma’lumotlar pm.gov.uz portalidagi shaxsiy kabinetda ham aks etadi. Yuborilgan havola orqali fuqaro davlat organi bergan javob bilan tanishib, jarayonga o‘z munosabatini bildira oladi.
Agarda berilgan javob fuqaroni qanoatlantirsa, u “Roziman” tugmasini bosadi. Aksincha, amaldorlar tomonidan yuzaki yoki rasmiyatchilik uchun javob berilgan deb hisoblansa, “E’tirozim bor” tugmasi tanlanadi va murojaat avtomatik ravishda takroran ijroga yuboriladi. Ushbu tizim davlat organlari mas’uliyatini oshirishga xizmat qilishi kutilmoqda.
