Yangi Toshkentdagi musiqiy favvora Xitoy rekordini ortda qoldirib, ikkita Ginnes sertifikatini qo‘lga kiritdi
Vazirlar Mahkamasi huzuridagi Yangi Toshkent shahrini qurish direksiyasi ma’lumotlariga ko‘ra, Ginnes rekordlari tashkilotining rasmiy hakami Meggi Luo ushbu tarixiy natijalarni tasdiqlovchi maxsus sertifikatlarni topshirgan. Majmuaning suv otish balandligi 232,69 metrga yetib, ochiq osmon ostidagi eng baland musiqiy favvora sifatida jahon rekordlar kitobidan joy oldi. Bungacha bo‘lgan natija Xitoyning Szyansu provinsiyasidagi 204,7 metrlik favvoraga tegishli edi.
Ikkinchi jahon rekordi esa suv yuzasida hosil qilingan tasvir proyeksiyasi hajmi bilan bog‘liq. Majmuaning 2617,23 kvadrat metr maydonni egallagan aylana suv ekrani ushbu yo‘nalishda ham dunyoda eng yirigi deb topildi. Avvalgi eng yuqori ko‘rsatkich 2400 kvadrat metrni tashkil etgan.
Qariyb 8 gektar umumiy maydonni egallagan ushbu loyihaning suv yuzasi 6,3 gektarga teng bo‘lib, majmua taqdimoti joriy yilning mart oyida davlat rahbariga o‘tkazilgan edi. Yangi obyekt poytaxtning eng ko‘rkam va zamonaviy hordiq chiqarish maskanlaridan biriga aylanadi.
