Yangi Toshkentda “Ozarbayjon” bog‘i barpo etiladi
Oʻzbekiston prezidenti Shavkat Mirziyoyev va Ozarbayjon prezidenti Ilhom Aliyev Yangi Toshkentda “Ozarbayjon” bogʻini barpo etish ishlarini boshlab berdi. Bu haqda davlat rahbarining matbuot xizmati xabar berdi.
Bogʻ Yangi Toshkentda 4 gektar maydonda barpo etiladi. Bu yerda Ozarbayjon madaniyati, koʻp asrlik tarixi va milliy anʼanalarini aks ettiradigan zamonaviy jamoat makoni tashkil etiladi. U ikki qardosh xalqning madaniy yaqinligi va doʻstligini namoyon etadigan maskanga aylanishi kutilmoqda.
Qayd etildiki, “bunday ezgu tashabbus ikki tomonlama xususiyatga ega”. Bundan avval Shavkat Mirziyoyevning Ozarbayjonga davlat tashrifi doirasida Boku shahrining “Oq shahar” hududida “Oʻzbekiston” bogʻiga tantanali ravishda tamal toshi qoʻyilgan edi. 4,5 gektar maydonda tashkil etiladigan ushbu majmuada Oʻzbekistonning boy madaniyati va anʼanalari, milliy meʼmorchilik maktabi oʻziga xos tarzda namoyon etiladi. Unda O‘zbekiston tarixiy obidalarining meʼmoriy timsollari, yashil hududlar va sayr maskanlarini barpo etish koʻzda tutilgan.
Xabarda, shuningdek, Toshkentdagi “Ozarbayjon” va Bokudagi “Oʻzbekiston” bogʻlari ikki xalqning koʻp asrlik doʻstligi, oʻzaro hurmati va maʼnaviy yaqinligining yana bir yorqin ramziga aylanishi qayd etilgan.
Davlat rahbarlari boʻlajak bogʻ hududida ramziy kapsulani joylashtirib, loyihani amalga oshirishga start berdi.
Eslatib o‘tamiz, avvalroq “Toshkent-Humo” xalqaro aeroportida Ozarbayjon yetakchisini shaxsan O‘zbekiston Prezidenti Shavkat Mirziyoyev va uning rafiqasi tantanali ravishda kutib olgandi. Ikki davlat bayroqlari ko‘tarilgan munosabat bilan oliy martabali mehmon sharafiga faxriy qorovul saf tortgan.
Shuningdek, O‘zbekiston va Ozarbayjon Prezidentlari Shavkat Mirziyoyev hamda Ilhom Aliyev “Abadiy do‘stlik to‘g‘risida”gi shartnomani imzoladi. Hujjat 23-avgust kuni Toshkentda, oliy darajadagi muzokaralar yakunida imzolandi.
