Yakkasaroydagi qurilishda xavfsizlik qoidalari buzilishi sababli yirik kanalizatsiya tarmog‘i yorildi
Toshkent shahrining Yakkasaroy tumanida qurilish maydonidagi qoidabuzarlik sababli diametri 1800 mm bo‘lgan yirik oqova suv tarmog‘i shikastlandi va tuproq o‘pirilishi yuz berdi.
Joriy yilning 3-iyul kuni soat 15:15 atrofida Yakkasaroy tumanining Salar ko‘chasi, “Solaris” turar joy majmuasi yaqinida yirik kommunal avariya qayd etildi.
Hududda diametri 1800 mm bo‘lgan temir-beton kanalizatsiya quvuri yorilishi oqibatida tuproq o‘pirilib tushgan. Hokimlik ma’lumotlariga ko‘ra, avariyaga shu atrofda qurilish ishlarini olib borayotgan “Better best” MCHJ tomonidan texnik me’yorlar va xavfsizlik talablari qo‘pol ravishda buzilgani sabab bo‘lgan. Mas’ul tashkilotlar mazkur qurilish kompaniyasini muhandislik tarmoqlarini himoya qilish zarurligi to‘g‘risida avvalroq bir necha bor rasman ogohlantirgan. Biroq kompaniya tomonidan zarur xavfsizlik choralari o‘z vaqtida ko‘rilmagan.
Hozirda voqea joyida Toshkent shahri va Yakkasaroy tumani hokimliklari, “Toshkent shahar suv ta’minoti” MCHJ hamda boshqa kommunal xizmatlar xodimlari tomonidan tunu kun tiklash ishlari olib borilmoqda.
Rasmiylarga ko‘ra, obyektdagi vaziyat to‘liq nazoratga olingan. Baxtli tasodif tufayli hodisa oqibatida hech kim jabrlanmagan.
Mazkur holat yuzasidan dastlabki hujjatlar to‘planib, huquqiy baho berish va aybdorlarga nisbatan chora ko‘rish uchun huquqni muhofaza qiluvchi organlarga topshirilgan. Hokimlik qoidabuzarliklar tasdiqlangan taqdirda, qurilish kompaniyasi va mas’ul shaxslar qonuniy javobgarlikka tortilishini bildirdi.
