Yakkabog‘da Amir Temur muzey-yodgorlik majmuasi barpo etiladi
UzA bergan ma’lumotlarga ko‘ra, yangi barpo etiladigan majmuaning markaziy qismidan Amir Temurning mahobatli haykali o‘rin oladi. Yodgorlik atrofida esa zamonaviy infratuzilmaga ega madaniy va ma’rifiy obyektlar majmui barpo etilishi ko‘zda tutilgan.
Loyiha doirasida hududda muzey va kutubxonadan tashqari, tarixiy uslubda bunyod etiladigan madrasa, mehmonxona hamda milliy taomlar maskani qad rostlaydi. Shuningdek, tashrif buyuruvchilar uchun hunarmandchilik va zargarlik do‘konlari, istirohat bog‘lari hamda favvoralar kompleksi tashkil etiladi.
Majmuaga kirish qismida tarixiy me’morchilik uslubida salobatli arka qurilishi rejalashtirilgan. Mutasaddi vakillarning ta’kidlashicha, ushbu maskan nafaqat mahalliy va xorijiy sayyohlarni jalb etuvchi turistik markazga, balki yoshlarni vatanparvarlik ruhida tarbiyalashga xizmat qiluvchi muhim ma’rifiy go‘shaga aylanadi.
