Xorijda aldangan o‘zbekistonliklarning yarim million dollardan ortiq maoshi va tortib olingan pasportlari qaytarildi
Migratsiya agentligiga kelib tushgan murojaatlar tahliliga ko‘ra, yetti oy davomida xorijdagi 622 nafar o‘zbekistonlikning to‘lanmay qolgan maoshi va kompensatsiya pullari undirib berildi. Qaytarilgan mablag‘larning umumiy miqdori 570 ming dollarni tashkil etadi. Maosh bo‘yicha muammolarning eng ko‘pi Rossiyada (375 ta), Turkiya (129 ta) va Janubiy Koreyada (85 ta) kuzatilgan.
Oylik maoshdan tashqari, xorijiy ish beruvchilar va nohalol vositachilar tomonidan noqonuniy olib qo‘yilgan pasport va shaxsni tasdiqlovchi hujjatlarni qaytarish bo‘yicha ham tezkor ibratli amaliyotlar o‘tkazilgan. Shu davr ichida 383 nafar fuqaroning hujjatlari o‘z egalariga qaytarildi. Hujjat topshirish va tortib olish bilan bog‘liq noqonuniy holatlarning eng yuqori ko‘rsatkichi Turkiyada (185 ta) hamda Rossiyada (182 ta) qayd etilgan.
Agentlik ma’lumotiga ko‘ra, yetti oy ichida chet elda mehnat qilayotgan fuqarolarning nafaqat maosh va hujjat, balki mehnat huquqlariga taalluqli boshqa ko‘plab maishiy va huquqiy muammolariga ham barqaror yechim topilgan. Hozirda xorijda qiyin ahvolda qolgan va huquqlari poymol etilayotgan o‘zbekistonliklarga amaliy yordam ko‘rsatish ishlari davom ettirilmoqda.
