Xorazmlik tadbirkor unga 824 million so‘m jarima solinganini aytib chiqdi. MIB qarzdorlik sababini ma’lum qildi
Ijtimoiy tarmoqlarda Xorazm viloyatida faoliyat yurituvchi tadbirkorga qariyb 824 million so‘m miqdorida jarima qo‘llangani haqida videomurojaat tarqaldi. Mazkur tadbirkor “MAMATSAPO XAJARBIBI” oilaviy korxonasi korxonasi rahbari B. Otboyev ekani ma’lum bo‘ldi.
Videoda tadbirkor holat yuzasidan yig‘lab murojaat qilib, katta miqdordagi summani to‘lash imkoniyati yo‘qligini bildirgan. U o‘zining aybi yo‘qligini, bu holat bo‘yicha avval hech kim u bilan bog‘lanmaganini ta’kidlagan.
“Menda ayb yo‘q, hech kim xabarlashgani ham yo‘q. O‘g‘rilik qilib, qo‘rqayotganim ham yo‘q. Oilamdagilarni o‘ylayapman. O‘zi 4 million so‘m to‘lay olmayapman, 850 million so‘mni so‘rab kelishsa nima deyman?” — deydi tadbirkor videomurojaatida.
Shuningdek, videoda Majburiy ijro byurosiga (MIB) oid skrinshotlar ham ko‘rsatilgan. Ularda 31 million 717 ming 935 so‘m hamda 792 million 989 ming 584 so‘m miqdoridagi summalar aks etgan.
Mazkur holat yuzasidan MIB hamda Biznes-ombudsman 5-sentyabr kuni rasmiy munosabat bildirdi.
MIB ma’lumotiga ko‘ra, Fuqarolik ishlari bo‘yicha Urganch tumanlararo sudining hal qiluv qaroriga asosan, “MAMATSAPO XAJARBIBI” oilaviy korxonasining qoplanmagan soliq qarzini korxona rahbari B. Otboyevdan subsidiar tartibda, ya’ni korxona tomonidan qoplanmagan majburiyatlarni uning shaxsiy mol-mulki hisobidan undirish belgilangan.
Sud hujjatiga asosan, Xorazm viloyati soliq boshqarmasi foydasiga 792 million 948 ming 384 so‘m soliq qarzi, 41 ming 200 so‘m pochta xarajati hamda davlat foydasiga 31 million 717 ming 935 so‘m davlat boji undirilishi belgilangan.
MIB ushbu mablag‘lar fuqaroga soliq organi tomonidan alohida jarima sifatida qo‘llanilgan summa emasligini ta’kidladi. Qayd etilishicha, qarzdorlik “MAMATSAPO XAJARBIBI” oilaviy korxonasi tomonidan o‘z vaqtida qoplanmagan soliq majburiyatlari natijasida yuzaga kelgan.
Ijro hujjatlari 2026-yil 29-avgust kuni MIBning tegishli bo‘limi ish yurituviga kelib tushgan. Shuningdek, qarzdorni ijro hujjatidagi majburiyatlar haqida xabardor qilish maqsadida uning telefon raqamiga SMS xabarnomalar yuborilgani ma’lum qilingan.
O‘z navbatida, Biznes-ombudsman mazkur holatni nazoratga olgan. Hozirda soliq idoralari vakillari hamda tadbirkor ishtirokida uchrashuv tashkil etilib, vaziyatning qonunchilik talablariga muvofiqligi o‘rganilmoqda.
Biznes-ombudsman o‘rganish natijalari bo‘yicha qo‘shimcha ma’lumot berilishini bildirgan.
