Urganch aeroporti va Xiva o‘rtasida yangi tezyurar elektropoyezd qatnovi yo‘lga qo‘yildi
Urganch aeroporti va Xiva shahri o‘rtasida zamonaviy tezyurar elektropoyezd yo‘lovchilarga xizmat ko‘rsata boshlaydi. Poyezd 415 nafar yo‘lovchiga mo‘ljallangan bo‘lib, chipta narxi kattalar uchun 25 ming, bolalar uchun 14 ming so‘m etib belgilangan.
Yangi elektropoyezd Xitoyning CRRC Dalian kompaniyasida ishlab chiqarilgan CR200J rusumli bo‘lib, 6 ta vagondan iborat. Soatiga 160 kilometrgacha tezlikda harakatlana oladi. Vagonlarda “Econom” toifasidagi o‘rindiqlar, har bir o‘rindiqda USB quvvatlantirish qurilmalari va iqlim nazorati tizimi mavjud. Shuningdek, nogironligi bo‘lgan yo‘lovchilar uchun maxsus joylar ajratilgan.
Poyezdlar harakat jadvali:
- 7055-sonli “Urganch Aerovokzal — Xiva”: Urganch Aerovokzaldan soat 08:40 da jo‘naydi, Urganchga 08:59 da yetib kelib, 09:02 da yo‘lga chiqadi. Xivaga 09:22 da yetib boradi.
- 7058-sonli “Xiva — Urganch Aerovokzal”: Xivadan soat 21:00 da jo‘naydi, Urganchga 21:20 da yetib kelib, 21:23 da yo‘lga chiqadi. Urganch Aerovokzalga 21:42 da yetib boradi.
Chipta narxi kattalar uchun 25 ming so‘m, bolalar uchun esa 14 ming so‘mni tashkil etadi. Chiptalarni “O‘zbekiston temir yo‘llari” elektron chipta platformasi orqali xarid qilish mumkin. Qo‘shimcha ma’lumot uchun 1005 qisqa raqamiga murojaat qilish mumkin.
