“Turonbank”, “O‘zekspomarkaz” va Xalqaro biznes markazi qator korxonalardagi davlat ulushlari sotiladi
O‘zbekistonda bank, sug‘urta, sanoat va transport korxonalari, shuningdek, bozorlar hamda savdo majmualaridagi davlat ulushlarini xususiylashtirish rejalashtirilmoqda. Tegishli ro‘yxat prezidentning 28-avgustdagi iqtisodiyotda davlat ishtirokini qisqartirishga oid farmoni bilan tasdiqlangan.
Ro‘yxatga ko‘ra, “Turonbank” aksiyalarining 98,9 foizi ochiq savdolarga chiqariladi. Iqtisodiyot va moliya vazirligi bankning tayyorgarlik darajasi va xalqaro maslahatchilar xulosalarini hisobga olib, uni xususiylashtirishga tayyorlaydi. Davlatga to‘liq tegishli “Xalq Sug‘urta” kompaniyasini ham sotish ko‘zda tutilgan.
Transport korxonalari orasida “Toshkent yo‘lovchi vagonlarini qurish va ta’mirlash zavodi”ning 90 foizlik hamda “O‘zbekiston temir yo‘llari” tizimidagi “Andijon mexanika zavodi”ning 100 foizlik ulushi savdoga qo‘yiladi.
Bundan tashqari, quyidagi korxona va tashkilotlardagi ulushlar sotilishi belgilangan:
- “O‘zekspomarkaz” — 91,83 foiz;
- Xalqaro hamkorlik markazi — 79,27 foiz;
- KO-UNG CYLINDER — 54,76 foiz;
- Kor-UNG Investment — 50 foiz;
- V-GEN BIOPHARMA — 50 foiz;
- Inno Texnopark — 100 foiz;
- Ustudy — 50 foiz;
- “O‘ZBEK-TURK TEST MARKAZI” — 51 foiz.
“Bodomzor” metro bekati yaqinidagi Xalqaro biznes markazi sifatida tanilgan Xalqaro hamkorlik markazi hamda “O‘zekspomarkaz”ni sotishda alohida tartib qo‘llanadi. Ularning xususiylashtirish konsepsiyasi va savdo shartlari Prezident administratsiyasi bilan kelishilishi lozim.
“Trastbank”dagi davlatga tegishli 0,001 foizlik ulush ham ro‘yxatdan o‘rin olgan. Mazkur aksiyalar paketini alohida baholashdan o‘tkazmasdan, birja kotirovkasi bo‘yicha sotishga ruxsat berilgan.
Xususiylashtirish doirasida “Avtomagistral” unitar korxonasi va yo‘llarni qurish, ulardan foydalanish hamda saqlash bilan shug‘ullanuvchi qator hududiy korxonalardagi davlat ulushlari ham sotiladi.
Shuningdek, Namangan, Samarqand, Surxondaryo, Toshkent va Farg‘ona viloyatlaridagi dehqon bozorlari hamda savdo majmualari ro‘yxatga kiritilgan. Ushbu obyektlarning aksariyatida davlat nazorat paketiga ega.
