Turkiyada dengizdan o‘zbekistonlik erkakning jasadi topildi
Turkiyaning Istanbul shahri Şile tumanida dengizga tushib, oqim oqizib ketgan 54 yoshli O‘zbekiston fuqarosi Abdurrahman Muhammado‘g‘lining jasadi ikki kunlik qidiruv ishlaridan so‘ng topildi. Bu haqda Hurriyet xabar berdi.
Voqea 16-avgust kuni soat 15:15 atrofida Şile Macera Parki sohilida sodir bo‘lgan. Ma’lumotlarga ko‘ra, besh kishi dengizga tushganidan keyin cho‘kish xavfiga duch kelgan. Voqea haqida xabar berilgach, hududga Sohil xavfsizlik xizmati, o‘t o‘chirish va tibbiy ekipajlari yuborilgan.
Qutqaruvchilar to‘rt kishini dengizdan olib chiqishga muvaffaq bo‘lgan. Abdurrahman Muhammado‘g‘li esa oqim sabab ochiq dengiz chiqib ketib, ko‘zdan yo‘qolgan.
Shundan so‘ng Sohil xavfsizlik xizmati qayiqlari, o‘t o‘chirish xodimlari va ko‘ngilli qutqaruvchilar ishtirokida qidiruv ishlari boshlangan. Qidiruvlar Şile tumanining Karakiraz hududi va uning atrofida kuchaytirilgan.
Ikki kun davom etgan qidiruv natijasida Muhammado‘g‘lining jasadi suvdan topildi. Uning jasadi sud-tibbiy ekspertiza o‘tkazish uchun olib ketilgan.
