Toshkentning 3 ta tumanida gaz ta’minoti 4 kungacha uzib qo‘yildi
“Hududgaz Poytaxt” gaz ta’minoti filiali ma’lumotlariga ko‘ra, Olmazor tumanining “Qora-Qamish 1/2” dahasida ikkita eskirgan gaz taqsimlash punktini yangilash rejalashtirilgan. Shu sababli 14-avgust kuni soat 11:00 dan 15:00 ga qadar “Islom ota” MFYdagi 312 ta xonadondan iborat ko‘p qavatli uy hamda 2 ta ulgurji iste’molchi vaqtincha gazsiz qoladi.
Eng yirik texnik tadbirlar Yangihayot va Sergeli tumanlariga to‘g‘ri kelmoqda. Bu yerda yer osti gaz quvurlari hamda eski taqsimlash punktini almashtirish munosabati bilan 12-avgust soat 08:00 dan 15-avgust soat 17:00 ga qadar uzilishlar belgilangan. Ta’mirlash ishlari ikkala tumanning o‘nlab mahallalarini qamrab oladi.
Xususan, Yangihayot tumanidagi “Yo‘ldosh”, “Olchazor”, “Do‘stlik”, “Toshkent” kabi 16 ta MFY hamda Sergeli tumanidagi “O‘zgarish”, “Yangi Sergeli”, “Qipchoq”, “Daryo bo‘yi” kabi 16 ta mahalla hududida joylashgan hovli va ko‘p qavatli xonadonlar, shuningdek, ulgurji iste’molchilar gazdan uziladi. Soha mutasaddi xodimlari ishlar yakunlangach, xavfsizlik qoidalariga rioya qilgan holda gaz ta’minotini bosqichma-bosqich tiklashni va’da qilmoqda.
10-avgust kuni ham Chilonzorda daraxt gaz quvuriga qulab, 6 ta ko‘p qavatli uy gazsiz qolgan edi.
Avvalroq 560 mingdan ortiq ehtiyojmand oilaga 92 milliard so‘mlik energiya kompensatsiyasi to‘lab berilgan edi.
