Toshkentdagi Glinka ko‘chasida portlash sababi ma’lum qilindi
Avvalroq Glinka ko‘chasidagi yo‘lning bir qismi o‘pirilib tushgani va hududda ta’mirlash ishlari olib borilayotgani haqida xabar berilgandi.
Toshkent shahar hokimligining dastlabki ma’lumotlariga ko‘ra, diametri 219 mm bo‘lgan yerosti gaz quvuridan sizib chiqqan gaz issiqlik tarmog‘i kamerasida to‘planib, avariya holatini yuzaga keltirgan.
Tekshiruv davomida gaz quvurining taxminan 375 kvadrat santimetr (15×25 sm) maydonidagi bir nechta nuqtadan gaz sizib chiqayotgani aniqlangan.
Ayni paytda mutaxassislar hodisaning sabablari va tafsilotlarini o‘rganishda davom etmoqda. Tekshiruv yakunlangach, yo‘l qoplamasini tiklash ishlari davom ettirilib, ko‘cha yaqin vaqt ichida transport harakati uchun ochilishi rejalashtirilgan.
Hokimlik ma’lumotiga ko‘ra, holat yuzasidan jinoyat ishi qo‘zg‘atilgan va tergov harakatlari olib borilmoqda. Tergov yakunlari bo‘yicha aybdor shaxslarning xatti-harakatlariga huquqiy baho beriladi.
