Toshkentdagi 114 yillik tarixiy bino Zamonaviy san’at markaziga aylantirildi
Prezident Shavkat Mirziyoyev tashabbusi bilan Toshkentda barpo etilgan Zamonaviy san’at markazi — CCA Tashkent o‘z faoliyatini boshlamoqda. Markaz Markaziy Osiyoda bu ko‘lamdagi ilk doimiy zamonaviy san’at maydoni sifatida taqdim etilmoqda.
Markaz joylashgan tarixiy bino 1912-yilda me’mor Vilgelm Geynselman loyihasi asosida qurilgan. Dastlab shahar tramvaylari deposi bo‘lgan inshoot keyinchalik dizel elektr stansiyasi sifatida foydalanilgan. So‘nggi yillarda esa bino qarovsiz holatda qolgan edi.
Inshootni qayta tiklash va zamonaviy madaniy markazga moslashtirish konsepsiyasi Fransiyaning Studio KO me’moriy byurosi tomonidan ishlab chiqilgan. Rekonstruksiya jarayonida binoning qadimiy g‘isht devorlari, me’moriy shakllari va sanoat obyektiga xos jihatlarini imkon qadar saqlab qolishga e’tibor qaratilgan.
Shu bilan birga, majmua zamonaviy talablarga moslashtirilib, unda ko‘rgazma zallari, ta’lim maydonlari, tadqiqot markazi, maxsus kutubxona hamda jamoatchilik uchun ochiq hududlar tashkil etilgan.
Markazga tashrif buyuruvchilar O‘zbekiston va jahon zamonaviy san’ati namunalari bilan tanishishi, ma’ruza va seminarlarda qatnashishi, kino namoyishlarini tomosha qilishi hamda kutubxona va tadqiqot maydonlaridan foydalanishi mumkin.
CCA Tashkent nafaqat ko‘rgazmalar o‘tkaziladigan maskan, balki san’at, ta’lim, ilmiy izlanish va jamoatchilik muloqotini birlashtiruvchi yangi madaniy makon sifatida faoliyat yuritishi ko‘zda tutilgan.
.jpg&w=3840&q=75)
.jpg&w=3840&q=75)
