Toshkentda qurilish ishlari uchun berib yuborilgan bolalar va futbol maydonchasi aholiga qaytarildi
Toshkent shahrining Uchtepa tumanida aholi o‘z mablag‘i hisobidan barpo etgan bolalar va futbol maydonchasi joylashgan yerga tadbirkorlik subyektining huquqi sud qarori bilan bekor qilindi va aholining o‘ziga qaytarib berildi. Bu haqda Prezident Xalq qabulxonasi xabar berdi.
Qayd etildiki, Quyi Darxon mahallasining Taqachi mavzesidagi 42–44-uylarda yashovchi fuqarolar 2014–2015-yillarda qarovsiz bo‘sh yerda hashar yo‘li bilan futbol va bolalar maydonchasini qurgan. Bir necha yil davomida hudud aholisi va ularning farzandlari ushbu maydonchalardan foydalanib kelgan.
2026-yil mart oyida o‘zini “Inter Express Service” MCHJ vakillari sifatida tanishtirgan shaxslar mahallaga kelib, mazkur hududda qurilish ishlari olib borilishini bildirgan. Bundan norozi bo‘lgan aholi 16-mart kuni Prezident Xalq qabulxonasiga murojaat qilgan.
Uchtepa tumani prokuraturasi murojaatni o‘rganib, yer 2018-yilda tuman hokimining 946-sonli qarori asosida “Inter Express Service” MCHJga savdo va maishiy xizmat ko‘rsatish shoxobchasi qurish uchun ajratilganini ma’lum qilgan. Yer uchastkasi 2025-yil 25-fevralda davlat ro‘yxatidan o‘tkazilib, kompaniya nomiga rasmiylashtirilgan.
Biroq maydonchalar mavjud hududning qanday asosda bo‘sh yer sifatida baholangani hamda 2018-yilda ajratilgan yer nega shu paytgacha maqsadli ishlatilmagani to‘liq tekshirilmagan. Shu sababli Prezident Xalq qabulxonasi 17-iyun kuni murojaatni qayta ko‘rib chiqish uchun yuborgan.
O‘rganishlar yakunida Toshkent tumanlararo iqtisodiy sudining qarori bilan “Inter Express Service” MCHJning ushbu yer maydoniga bo‘lgan huquqi bekor qilindi. Natijada bolalar va futbol maydonchasi aholi foydalanishida qoladigan bo‘ldi.
