Toshkentda kuzgi issiq suv o‘chirish mavsumi boshlanadi
“Veolia Energy Tashkent” kompaniyasi ma’lumotlariga ko‘ra, issiq suv tarmoqlaridagi ta’mirlash va profilaktika tadbirlari poytaxt tumanlari kesimida besh bosqichda amalga oshiriladi. Har bir bosqichda tegishli markaziy issiqlik manbalari (IM) va issiqlik elektr markazlari (IEM) doirasiga kiruvchi hududlar 5 kun muddatga issiq suv ta’minotidan uziladi.
Dastlabki bosqich 14-18-sentyabr kunlari 2-IM, 7-IM va Tosh-IEM hududlarini qamrab oladi hamda Mirzo Ulug‘bek, Yashnobod, Yakkasaroy, Mirobod, Chilonzor, Shayxontohur va Sergeli tumanlarining qator mahallalarida issiq suv ta’minoti to‘xtatiladi. Keyingi bosqichlar esa 21–25-sentyabr (1-IM va 3-IM), 28-sentyabr – 2-oktyabr (4-IM) kunlari Yunusobod, Olmazor hamda Shayxontohur tumanlarida davom ettiriladi.
Oktyabr oyida esa o‘chirish jadvali Mirobod, Sergeli, Yangihayot, Bektemir (5–9-oktyabr, 6-IM, 8-IM, Vodnik va Sanoatenergo) hamda Chilonzor va Uchtepa tumanlari (12–16-oktyabr, 5-IM) mahallalarini qamrab oladi. Kommunal xizmatlar ta’mir ishlarini belgilangan muddatlarda yakunlashni rejalashtirgan.
