Toshkentda jamoat transportida yo‘lkira narxi oshishi kutilmoqda
Xalq deputatlari Toshkent shahar Kengashining qarori loyihasiga ko‘ra, elektron to‘lov tizimidan foydalanuvchilar uchun bir martalik yo‘lkira haqi 2 500 so‘m etib belgilanishi kutilmoqda. Shu bilan birga, naqd pul orqali amalga oshiriladigan to‘lovlar uchun amaldagi 3 000 so‘mlik tarif o‘zgarishsiz qoladi, yo‘lovchilar bagajini tashish qiymati esa 4 000 so‘m bo‘ladi.
Hujjatda transport kartalari va abonent paketlari uchun ham yangi narxlar nazarda tutilgan. Jumladan, avtobus va metroda 1 kunlik cheksiz qatnov 13 500 so‘m, 1 oylik tarif 345 ming so‘m, 1 yillik cheksiz yo‘l chiptasi esa 2,7 million so‘m bo‘lishi taklif qilinmoqda. Shuningdek, 10, 20 va 30 martalik qatnov paketlari ham mos ravishda arzonlashtirilgan narxlarda taqdim etiladi.
Bir soat ichida boshqa transportga o‘tishda amal qiladigan chegirmalar tizimi saqlab qolinadi. Yo‘lovchi bir soat davomida avtobusdan ikkinchi avtobusga o‘tganda 1 500 so‘m to‘laydi, uchinchi va undan keyingi o‘tishlar esa mutlaqo bepul bo‘ladi. Ushbu tartib va yangi tarif rejasi belgilangan tartibda tasdiqlangach, 2026-yil 1-oktyabrdan to‘liq kuchga kirishi rejalashtirilgan.
