Toshkentda 233 mingdan ortiq talaba viloyatdan kelib o‘qiyapti. Senator asosiy muammo nima ekanini aytdi
Oliy Majlis Senatining 17-yalpi majlisida senator Malika Qodirxonova bergan ma’lumotga ko'ra, bugungi kunda poytaxtda 94 ta oliy ta’lim muassasasi mavjud bo‘lib, ularda salkam 300 mingga yaqin talaba tahsil olmoqda. Ulardan 233 257 nafari (salkam 80 foizi) viloyatlardan kelib o‘qiydi va ularning eng birinchi muammosi turar joy topish bilan bog‘liq.
Vazirlar Mahkamasining 2026-yil 5-maydagi 224-sonli nizomiga asosan, talabalarni yashash joyi bo‘yicha vaqtincha ro‘yxatga qo‘yish Yagona interaktiv davlat xizmatlari portali (My.gov.uz) orqali avtomatik ravishda amalga oshirilishi belgilangan. Biroq amaliyotda to‘siq yuzaga kelmoqda.
Nizom talablariga ko‘ra, bir kishi uchun turar joy maydonining ijtimoiy normasi qat’iy 16 kvadrat metr etib belgilangan. Agar talaba ijaraga olgan xonadonda ajratilgan joy 16 kvadrat metrdan kam (masalan, 10 yoki 15 kv.m) bo‘lsa, elektron tizim arizani avtomatik ravishda rad etmoqda.
Hatto xonadon talaba uchun qulay joylashgan boʻlsa ham, ijtimoiy norma yetmagani sababli talabalar tizimga ro‘yxatdan o‘tolmayapti.
Ushbu texnik va huquqiy muammo tufayli belgilangan muddatda ro‘yxatdan o‘tolmagan talabalar ma’muriy javobgarlikka tortilishi mumkin.
Bugungi kunda ushbu qonunbuzarlik uchun jazo miqdori bazaviy hisob-kitob miqdorining (BHM) 3 barobarini tashkil etadi. Agar jarima 10 kun ichida to‘lansa, 50 foizlik chegirma qo‘llanilib, to‘lanishi kerak bo‘lgan summa 618 ming so‘mni tashkil etmoqda. Senator mas’ul tashkilotlarni ushbu masalani qayta ko‘rib chiqishga chaqirdi.
