Toshkent viloyatidagi Piskom daryosidan 30 yoshli fuqaroning jasadi topildi
Toshkent viloyatining Bo‘stonliq tumanidagi Piskom daryosida 26-avgust kuni cho‘kib ketgan 30 yoshli fuqaroning jasadi qariyb ikki haftalik qidiruvlardan so‘ng topildi. Bu haqda Favqulodda vaziyatlar vazirligi xabar berdi.
Ma’lum qilinishicha, Qibray tumanida yashovchi fuqaro bir guruh tanishlari bilan Piskom daryosida SUP-doskada sayr qilayotgan vaqtida boshqaruvni yo‘qotib, qoyali qirg‘oqqa urilgan va suvga tushib ketgan. U qutqaruv nimchasi kiymagani sababli kuchli oqim uni suv ostiga olib ketgan.
Hodisa sodir bo‘lgan kundan boshlab FVV g‘avvoslari tomonidan qidiruv ishlari olib borilgan. 10-sentabr kuni soat 09:50 da fuqaroning jasadi g‘avvoslar tomonidan topilgan.
FVV fuqarolarni suv havzalarida xavfsizlik qoidalariga qat’iy rioya qilish, faqat maxsus ajratilgan joylarda cho‘milish hamda kichik hajmli suzish vositalaridan foydalanishda qutqaruv nimchasini kiyishga chaqirdi.
