Toshkent viloyatidagi maktabga qozoq yozuvchisi Raxmetolla Rayimqulov nomi berildi
Toshkent viloyati Bo‘stonliq tumanining Qoramanas qishlog‘idagi 34-sonli maktabga 1913-yilda shu yerda tug‘ilgan qozoq yozuvchisi, dramaturg va tarjimon Rahmetolla Rayimqulov nomi berildi. Bu haqda Qozog‘istonning O‘zbekistondagi elchixonasi xabar berdi.
Tantanali marosim Qozog‘istonning O‘zbekistondagi elchixonasi ko‘magida ikki mamlakat yozuvchilarining “Turkiy dunyoning ma’naviy merosi: adabiyot — davrlar va avlodlar muloqoti” forumi doirasida o‘tkazildi.
Maktabning ochilish marosimida Qozog‘iston va O‘zbekiston prezidentlari maslahatchilari Malik O‘tarbayev va Xayriddin Sultonov, Qozog‘istonning O‘zbekistondagi elchisi Yerali Tug‘janov, Turkiy madaniyat va meros jamg‘armasi prezidenti Aqtoti Rayimqulova, shuningdek, davlat idoralari, yozuvchilar uyushmalari vakillari va madaniyat arboblari ishtirok etdi.
Qozog‘iston TIV ma’lumotiga ko‘ra, yangi o‘quv yili boshlanishi arafasida maktab kutubxonasi yangilanib, yozuvchiga bag‘ishlangan xotira burchagi tashkil etildi. Kutubxona fondi qozoq va o‘zbek adiblarining asarlari bilan boyitildi.
Qozog‘iston elchisi Yerali Tug‘janov o‘z nutqida bu voqea shunchaki maktab ochilishi emas, balki qozoq va o‘zbek xalqlarining ko‘p asrlik umumiy tarixi, madaniyati va ma’naviy yaqinligining samarasi ekanini ta’kidladi.
Maktab o‘quvchilari uchun birinchi qo‘ng‘iroq marosimi hamda “Rahmetolla Raimqulov: avlodlarni birlashtiruvchi meros” mavzusida ochiq dars tashkil etildi.
Maktabga yozuvchi nomining berilishi O‘zbekiston va Qozog‘istonning umumiy tarixiy-madaniy merosini asrab-avaylash hamda ikki mamlakat o‘rtasidagi gumanitar aloqalarni mustahkamlash yo‘lidagi ishlardan biri sifatida qayd etildi.
