Toshkent va Namangan viloyatlarida 4,5 milliard so‘mlik elektr energiyasi o‘g‘irlandi
Departament o‘tkazgan reyd tadbirlarida eng yirik noqonuniy holatlar Bekobod tumani va Nurafshon shahrida aniqlandi. Bekobodda ikki fermer xo‘jaligi rahbari suv nasoslarini tarmoqqa o‘zboshimchalik bilan ulab, 2,1 milliard so‘mlik elektrni noqonuniy ishlatgan. Nurafshonda esa MChJ mas’ullari 37 ta ko‘p qavatli uydagi liftlar, nasoslar va yoritish tizimlarini to‘g‘ridan-to‘g‘ri elektrga ulab olib, 1,6 milliard so‘mlik ziyon keltirgan.
Shuningdek, Piskent tumanida fuqaro suv nasosini noqonuniy ishlatib 425,1 million so‘mlik, Namangan viloyatining To‘raqo‘rg‘on tumanida esa fuqarolar dala shiyponida tijorat maqsadida tarmoqqa ulanib 282,8 million so‘mlik elektr energiyasini o‘g‘irlagan. Qashqadaryo va boshqa hududlardagi kabi Nurota tumanida ham fuqaro o‘z xonadonida 143,5 million so‘mlik chiroqdan noqonuniy foydalangani ma’lum bo‘ldi.
Ushbu noqonuniy holatlarning barchasi yuzasidan Jinoyat kodeksining tegishli moddalari bo‘yicha jinoyat ishlari qo‘zg‘atildi. Hozirda tergov harakatlari olib borilmoqda.
