Toshkent Markaziy Osiyoda yashash narxi eng qimmat shaharlar qatorida peshqadamlardan biri bo‘ldi
Numbeo platformasi shahar foydalanuvchilari ma’lumotlari asosida tayyorlangan global yashash narxi reytingini e’lon qildi. Indeksni hisoblashda oziq-ovqat, transport, ijara, restoran va kommunal xizmatlar narxi inobatga olingan bo‘lib, asosiy mezon (100 ball) sifatida Nyu-York shahri olingan.
Mintaqa shaharlari jahon reytingida quyidagi o‘rinlarni egallagan:
Olmaota – 409-o‘rin;
Ostona – 469-o‘rin;
Toshkent – 487-o‘rin;
Bishkek – 493-o‘rin;
Dushanbe – 497-o‘rin.
Toshkent shahrining umumiy yashash qiymati indeksi 31,2 ballni tashkil etgan, ya’ni poytaxtda yashash Nyu-Yorkka nisbatan qariyb 70 foizga arzonroq. Shaharning uy-joy ijarasi indeksi 13,5 ball, oziq-ovqat mahsulotlari indeksi esa 35,2 ball etib baholangan. AQSH bilan solishtirilganda, O‘zbekistondagi umumiy yashash qiymati o‘rtacha 58,9 foizga, uy-joy ijarasi esa 70,9 foizga arzon hisoblanadi.
To‘rt kishilik oila uchun – oylik o‘rtacha xarajat taxminan 22,3 mln so‘m;
Bir kishi uchun – oylik o‘rtacha xarajat taxminan 6,1 mln so‘m.
Dunyo bo‘yicha eng qimmat shahar sifatida Shveysariyaning Syurix shahri (123,1 ball) qayd etilgan. Kuchli beshlikdan, shuningdek, Jorjtaun, Lyutsern, Bazel va Jeneva shaharlari joy olgan.
