Tojikistonning “asr loyihasi” bo‘lgan Rog‘un GESni yakunlash uchun yana $5,8 milliard kerak bo‘ladi
“S&P Global Ratings” agentligi ma’lumotlariga ko‘ra, zarur mablag‘ miqdori qurilish ishlarining bosqichma-bosqich bajarilishi va moliyalashtirilishi hisobiga biroz qisqargan. Shunday bo‘lsa-da, inflyatsiya, qurilish asbob-uskunalari narxi, hududning murakkab geologiyasi hamda qo‘shimcha xavfsizlik to‘g‘oni qurilishi sababli yakuniy xarajatlar yana o‘zgarishi mumkin.
Dushanbe ushbu summaning teng yarmini xalqaro donorlar hisobidan, qolgan qismini esa davlat byudjeti va stansiyaning o‘z daromadlari evaziga qoplashni rejalashtirgan.
Loyihani qo‘llab-quvvatlashda Jahon banki yetakchiligidagi 12 ta xalqaro hamkordan iborat konsorsium asosiy o‘rin tutmoqda. Xususan, Jahon banki obyektning navbatdagi bosqichi uchun 300 million dollarlik grant ajratdi. Shuningdek, Osiyo infratuzilma investitsiya banki va Italiyaning “Cassa Depositi e Prestiti” kompaniyasi yirik miqdorda mablag‘ yo‘naltirgan bo‘lsa, Yevropa investitsiya banki, Osiyo taraqqiyot banki va Yevropa Ittifoqi bilan yuzlab million yevrolik moliyaviy paketlar bo‘yicha muzokaralar yakuniy bosqichda turibdi.
Tojikiston hukumatining o‘zi ham ichki imkoniyatlarni safarbar qilib, stansiya uchun byudjet ajratmalarini 7 milliard somoniygacha oshirishni ko‘zda tutgan. Mamlakat 2017-yilda loyiha uchun chiqarilgan 500 million dollarlik yevrobondlar bo‘yicha majburiyatlarini ham belgilangan jadval bo‘yicha to‘lab bormoqda.
Mazkur qarzning asosiy qismi 2027-yil kuzigacha to‘liq yopilishi ko‘zda tutilgan.
