Tinchlikni buzganlik uchun sudga beriladi. O‘zbekistonda yangi shovqin tartibi joriy etildi
Yangi “Aholini shovqinning zararli ta’siridan himoya qilish to‘g‘risida”gi qonunga muvofiq, ish kunlari soat 23:00 dan 07:00 gacha hamda dam olish va bayram kunlari soat 22:00 dan 09:00 gacha belgilangan sanitariya me’yorlaridan ortiq shovqin qilish taqiqlanadi. Ushbu cheklovlar turar joy hududlaridagi maishiy faoliyat, qurilish-ta’mirlash ishlari, maxsus texnika va transport vositalari harakati natijasida kelib chiqadigan barcha shovqin turlariga taalluqli hisoblanadi.
Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi sohadagi vakolatli davlat organi etib belgilandi. Qonunchilikka ko‘ra, inson salomatligiga va organizmiga salbiy ta’sir ko‘rsatmaydigan, sanitariya qoidalarida belgilangan me’yordan oshmaydigan shovqin darajasiga yo‘l qo‘yiladi.
Yangi tartibning muhim jihati shundaki, shovqinning zararli ta’siri sababli salomatligi yoki mol-mulkiga zarar yetgan fuqarolar moddiy va ma’naviy kompensatsiya undirish uchun sudga murojaat qilish huquqiga ega bo‘ladi. Mazkur hujjat rasman e’lon qilingan kundan e’tiboran uch oy o‘tgach to‘liq kuchga kiradi.
