Texnikum bitiruvchilarini ishli qilganlarga imtiyozli bank kreditlari ajratiladi
Hukumatning 449-sonli nizomiga asosan, ushbu imtiyozdan foydalanmoqchi bo‘lgan tadbirkorlik subyektlari bir qancha majburiyatlarni bajarishi kerak. Jumladan, tashkilot texnikum bilan rasmiy shartnoma tuzishi, talabalarga amaliyot o‘tash uchun ish o‘rinlari ajratishi va ularga tajribali mutaxassislarni ustoz sifatida biriktirishi lozim.
Shuningdek, dual ta’limda o‘qiyotgan yoshlar bilan muddatli mehnat shartnomasi tuzilib, ularga oylik maosh to‘lanishi hamda bitiruvchilar bo‘sh ish o‘rinlariga ishga qabul qilinishi shart.
Kredit olish jarayoni maksimal darajada soddalashtirilgan. Boshlang‘ich bosqichda tashkilot tijorat bankiga tegishli ariza, texnikum va o‘quvchilar bilan tuzilgan shartnomalar, kreditdan foydalanish rejasi hamda soliqdan qarzdorligi yo‘qligi haqidagi ma’lumotnomalarni taqdim etadi.
Taqdim etilgan hujjatlar va korxonaning kredit layoqatliligi belgilangan talablarga mos kelsa, tijorat banki 3 ish kuni ichida ijobiy xulosa beradi. Shundan so‘ng kredit shartnomasi imzolanadi va ajratilgan mablag‘lar zudlik bilan korxonaning bank hisobvarag‘iga o‘tkazib beriladi. Ushbu yangi mexanizm yoshlarning amaliy ko‘nikmalarini oshirish bilan birga ularni kafolatlangan ish o‘rni bilan ta’minlashga xizmat qiladi.
