Telegram’da ayollarni “hijrat”ga chorlagan va jangarilar safiga yollagan ayol qidiruvga berildi
Huquq-tartibot idoralari ma’lumotiga ko‘ra, tarafdorlari orasida “Ummu Muhammad” taxallusi bilan tanilgan Me’rojixon Abobakirova ana shunday noqonuniy targ‘ibot va yollash faoliyatini olib borganlikda gumon qilinmoqda. U Telegram tarmog‘idan foydalanib, ayollarni diniy niqob ostida xorijdagi taqiqlangan tashkilotlar safiga qo‘shilishga da’vat qilgan.
Holat yuzasidan Me’rojixon Abobakirovaga nisbatan Jinoyat kodeksining 244²-moddasi (Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bo‘yicha jinoyat ishi qo‘zg‘atilib, u rasman xalqaro qidiruvga berildi.
Tergov organlari ushbu shaxs hamda uning turmush o‘rtog‘i Sarvarbek Abobakirovning joylashgan yeri haqida biror ma’lumotga ega bo‘lgan fuqarolardan DXXning 1520 yoki IIVning 1102 ishonch telefonlariga murojaat qilishni so‘ramoqda. Shuningdek, maxsus xizmatlar fuqarolarni diniy ta’lim nomi ostidagi shubhali da’vatlar va taqiqlangan guruhlar takliflaridan hushyor bo‘lishga chaqirdi.
